दिन-चर्या...!!! "रोहिणी संकलन" से...

बरखा भी नि झुरौणी, 

येक बूंद पाणिक भी नि औणी, 

गोर-बाछरोंकु लराट छ जोड्यु, 

गुठ्यार मा, 

त्यु द्योर भी नि बर्खीणी | 

हे मेरी ब्वे, निरास हवेगे, 

कुएड़ी-कुएड़ू छ दिखेड़ी, 

पार डाँड तू, 

पण ते द्योरतें, 

कन चुकपट पोड़गे |

 

सुबेर 4 बजी उठी तें, 

धार बिटिन पाणि लैगें, 

गुठ्यार्कु मोल गाड़ ले, 

भैंसी ज्वा रमौणी छ, 

वींमू घास भी धोल ले, 

पण चौसिंग्या लगोठ, 

मजाण कख लूकिगे |      

म्यार दग्ड्या सौब घस्यार, 

कबारि पैट गेन, 

थक गेन बिचार, 

मैं धई लगे तेन | 

दाथुड़ी अर डोरीड़ि, 

कुजाणी कख धोलि मैन,

खोजि-खोजिक पराण मेरु, 

जुकीड़ी तु ऐगे | 

"जीहोर" द्याखल त, 

खैर नि छ मेरी, 

कल्योकि त फंड फुका, 

पाणिन भरलु तब गेरी |

खाणु पकौण त दूरकि बात छ, 

चुल्लू भी नि जगौण देणी, 

हे मेरी माँजी तब मैन,

क्या सुदी ख़ाब खेच्णि...... ? 

 

 

रोहिणी संकलन से एक रचना...............ये रचना रोहिणी की निजी संपत्ति है, प्रकाशित करने से पहले कृपया संपर्क कर अनुमति लें|| rohinisnegi@gmail.com/rohininegi@yahoo.com